Журналистика кафедрасы

Кафедра тарихы

Кафедра меңгерушісі ф. ғ. к., доцент Жұмабеков М.К.

1993 жылы тәуелсіз Қазақстан Республикасында Алматының ҚазМУ-інен кейінгі екінші журналистика мамандығын даярлау бөлімі  Е.Бөкетов атындағы ҚарМУ-дың шаңырағында бой көтеріп, іргетасы қаланды.

Қарағанды Мемлекеттік университетіндегі журналистика кафедрасының ашылуына бастамашы болған әрі осы істі үлкен қажырмен жүргізген белгілі журналист-ғалым, өлкетанушы-тарихшы Зарқын Сыздықұлы Тайшыбаев болды. Зарқын Сыздықұлының бұл бастамасына университеттің сол жылдардағы ректоры, профессор Жамбыл Сәулебекұлы Ақылбаев барынша қолдау көрсетті.

Міне, содан бері сынаптай сырғыған жиырма жыл да өте шықты. Биыл Қазақстан жоғары оқу орындары ішінде журналистика мамандығын екінші болып ашқан Е.Бөкетов атындағы ҚарМУ-дың журналистика кафедрасы өзінің жиырма жылдық мерейтойын атап өту шарасына дайындық үстінде.

Кафедраның жиырма жылдық мерейтойы қарсаңында осынау ұжымның әр жылдардағы шежіресіне ой жүгірте отырып, өткенді еске алуды өзімізге борыш санаймыз. Кафедра тарихында өзіндік із қалдырып шәкірттерге сапалы білім, тағылымды тәрбие берген,  бұл күнде арамызда жоқ ардақты ұстаздар Кәрім Сауғабаев, Дәулетбек Мақашов, Сағатбек Мұғалімжанұлы, Берік Қойшығарин, Мартбек Тоқмырза, Жанар Құрманғалиевалардың есімдерін құрметпен еске алып, әруақтарына тағзым еткен абзал.

Жиырма жыл аз уақыт емес. Кезінде басқа кафедраларға телініп, мамандық ретінде ашылған журналистика кафедрасы қазір университеттің қабырғалы білім ордаларының біріне айналып отыр. Қазақстанда болып жатқан білім реформаларына сай журналистика кафедрасы да жаңару мен жаңғырудың сан түрлі өткелдерінен сүрінбей өтіп, қазір заманауи оқу-әдістемелік, ғылыми-техникалық базасы қалыптасқан іргелі білім беру саласының біріне айналды.

Қазір журналистика кафедрасы жыл сайын қанатын қатайтып, керегесін кеңге жаю үстінде. Заман талабына сай журналистика бакалавриатын дайындаумен ғана шектелмей, жаңадан «Қоғаммен байланыс» мамандығын ашып, көкжиегін одан әрі кеңейте түсті. Қазақ, орыс тіліндегі журналистика мамандарын дайындап қана қоймай, болашақ мамандардың ғылыммен айналсуына да мол мүмкіндіктер ашып отыр. 2012 жылдан бастап журналистика магистрлерін оқыту қолға алынды.

Университет басшылығының Орталық Қазақстандағы журналистика кадрларын дайындау үрдісіне ерекше көңіл бөліп,  қолдау көрсетуі сөз жоқ кафедраның болашағына үлкен кеңістік ашып, оның қалыптасуы мен дамуына жақсы ықпал етуде. Кафедраның оқытушы-ұстаздарының ғылыми потенциалы да жыл өткен сайын артып келеді. Қазіргі таңда журналистика мамандығы бойынша қорғаған екі ғылым докторы, сондай-ақ, ғылым кандидаттары мен магистр оқытушылардың қатары көбею үстінде. Осындай игілікті шаралардың оң шешімін табуына унверситет ректоры Еркін Қинаятұлы Көбеевтің үнемі қамқорлық жасап отырғанын ерекше атап айтқан ләзім.

Әрине, бұл жердегі ең басты мәселе Е.Бөкетов атындағы Қарағанды мемлекеттік университеті журналистика бөлімін бітіріп шыққан түлектердің білім деңгейі мен мамандықты игерудегі біліктілігі қандай дәрежеде деген сұрақтың болуы әбден заңдылық. Бірден айту керек, 20 жылдық еңбек еш кеткен жоқ. Оны өмірдің өзі көрсетіп отыр. ҚарМУ-дың журналистика мамандығын бітірген түлектерге деген сұраныс республика бойынша жоғары деңгейде. Қазақстанның кез келген бұқаралық ақпарат құралдарында біздің шәкірттеріміз маңдайалды мамандар ретінде көзге түсіп жүр. Республикалық, аймақтық, облыстық деңгейдегі түрлі ақпарат көздерінде қызмет жасап жүрген түлектерінің қадамы әрдайым назардан тыс қалған емес. Кейбір шәкірттеріміз баспасөз қызметі арқылы мемлекеттік ұйымдарда да абыройлы еңбек етуде. Президент әкімшілігі, түрлі министрліктер, мемлекеттік агенттіктер мен департаменттердің баспасөз қызметі және ұйымдастырушылық саласында ҚарМУ түлектерінің қызмет жасап жүруі біз үшін зор мақтаныш. Атап айтқанда, Е.Тоқшылық, Ж.Аманбаева, А.Талпақова, Ж.Қаржан, А.Кемпірбай, Е.Атамбай, Е.Қаламбай, Т.Тілеубай, Е.Қуатайұлы, А.Баязитова сияқты көптеген түлектеріміз журналист ретінде республикаға өз есімдерін танытып үлгерді.

Ал облыстық БАҚ-тың 50 пайызын ҚарМУ-дың журналистика бөлімінің түлектері құрайды. Атап айтқанда, «Қазақстан Қарағанды» телеарнасындағы Г.Ақажанова, А.Бухарбаева, А.Ағылбаевалар, «5-арнада» Ә.Сәбитова, А.Тонтаев, «Қарағанды-1»-де М.Салқынбаева, Т.Қали, Ә.Шалқарбек, А.Иса, «Орталық Қазақстан» газетінде Ж.Әлиман, Ж.Омарбекова, С.Әбілова сияқты түлектеріміз жемісті еңбек етіп жүр.

Ал республикалық жетекші телеарналар «Қазақстан» мен «Хабардың» меншікті  тілшілері – Руслан Тұрсынғалиев пен Ардақ Қабыханның ҚарМУ-дың түлектері екені кафедра үшін үлкен абырой.

«Орталық Қазақстан» газетінің журналистік ұстаханасынан тәжірибе жинаған тағы бір түлегіміз Жанат Жаңқашұлы бұл күнде «Арқа ақшамы» газетінің редакторы болып қызмет етуде.

Сондай-ақ, түрлі қоғамдық салаларда, мәселен, Қарағанды облыстық ішкі істер департаменті баспасөз қызметінде жемісті еңбек етіп жүрген шәкірттеріміз Бақытжан Құдияров, Жазира Орынбаева, Саян Жарылғап, төтенше жағдайлар департаментінде Қуаныш Мүтәлләповтар өз ісінің білікті мамандары ретінде бағаланады.

Журналистиканың теориясы мен тәжірибесіне университет қабырғасында жүріп қанықса да болашақ журналистер ақпарат кеңістігіне бірден қанат қағып кете алмасы анық. ҚарМУ-дың журналистика бөлімі түлектерін өздерінің шығармашылық ұстаханасында шыңдап, республикалық кеңістікке шығарып отырған «Орталық Қазақстан» газетінің ұжымына (бас редакторы М.Сембай) алғысымыз зор.

Ал күндізгі бөлімде оқитын студенттеріміздің  республикалық, халықаралық дәрежедегі ғылыми-практикалық конференциялар мен семинарларда, түрлі олимпиада мен тренингтерде алып жүрген жүлделері мен жетістіктері өз алдына үлкен әңгіме.

Бұл жердегі ең басты мәселе республика бойынша ҚазМҰУ-дың журналистика факультетіне шынайы бәсекелес болуға толыққанды жарап тұрған Е.Бөкетов атындағы журналистика бөлімінің 20 жылда жеткен осынау жетстіктері – қажырлы еңбек, жемісті ізденістер арқылы келгендігін көрсету ғана.

«Газет халықтың көзі, тілі һәм құлағы» деген кешегі Алаш зиялысы Ә.Бөкейханның сөзі бүгінгі ұлттық журналистиканың жас мамандары үшін айнымас қағидаға айналуы шарт.

Е.Е.Бөкетов атындағы Қарағанды мемлекеттік университеті филология факультеті журналистика кафедрасының аға оқытушысы, филология ғылымдарының докторы, профессор Қ.Асанов Қарағанды облысы әкімінің «Тіл жанашыры» байқауында «Тіл майталманы» номинациясының иегері атанды.

Оқытушы-профессорлар құрамы
Мамандықтар


Халықаралық бірлестік


Кафедрада жасалатын ғылыми бағыттар


Кафедрада жүргізілетін тәрбиелік жұмыс


Top